Amb una seisena victòria en sièis partidas, l’OM se sarra del recòrd establit pel Lilla OSC en 1937 (uèch victòrias per dobrir sa sason) e assegura sa plaça de capdavantièr. En L2, l’AE Mónegue torna de Lens amb tres ponches, quatre gòls de mai e una bona dòsi de fisança per la seguida.

La soliditat marselhesa
 
Tres jorns aprèp son rampèl en Turquia fàcia al Fenerbahçe d’Istambol, se podiá crénher una partida complicada fisicament, arser. Mas ongan, amb la seguida de bons resultats capitada dempuèi agost, l’OM ten una soliditat que se n’èra perdut la costuma del costat del Velodròm. Contra Evian-Thonon-Gaillard, tremolèron pas ges. Sens accelerar lo ritme ni tanpauc elevar lo nivèl vertadièrament, se’n sortiguèron sens cap de dificultat. Un còp franc de Valbuena qu’Amalfitano trencava del cap, e, pas mai, s’aguèt d’assegurar. Çò que saupèron far amb lo gaubi, malgrat una esquipa arpitana que quichèt tota la segonda temporada, sens trobar lo camin de la gàbia. Marselha demòra primièra, e contunha la siá seguida de victòrias, es verai, sens aver encontrat encara cap d’esquipa de primièr òrdre.
 
 
Bordèu jòga amb sos demònis
 
A Bordèu las setmanas passan, e la febrilitat demòra. Se cresiá que la neta victòria contra Brujas, en l’Europa League, seriá estada la primièra d’una polida seguida; pasmens los espèrs s’esvaniguèron, un còp de mai, qualques segondetas abans lo còp de fiulet final. Aprèp una primièra temporada agradiva, Bordèu dobriguèt lo marcador pel cap d’Henrique (54a minuta). Las causas semblavan lançadas, Jussiê manquèt de pauc la gàbia (60a). Mas los Girondins mancan de soliditat, coma totjorn, e Faty rampelèt dètz minutas après lo gòl d’Henrique. Gouffran auriá pogut balhar la victòria, amb un gòl que l’estadi pensava decisiu (78a), mas seriá estat sens comptar amb la tradicion de l’estadi Lescura dempuèi maites meses. Belghazouani tornèt l’AC Ajaccio al marcador, a la tota fin del temps suplementari, e manquèt de pauc de li balhar la victòria. Dos ponches s’envòlan, una setmana abans d’anar a Lion, que las causas i seràn pas tant aisadas, probable.
 
 
E Tolosa amb sos nèrvis!
 
Foguèt una partida de grand suspens que los seguidors tolosencs poguèron veire, dissabte. Dos còps menats (gòls de Pitroipa, 9a minuta, puèi d’Erding a la 65a per Rennes), los violets trobèron pasmens la fòrça mentala per salvar çò essencial e quitar l’Stadium amb un ponch. Pòdon tanben mercejar lo portièr, Ali Ahamada, que s’empleguèt com caliá per repossar los maites tirs dels bretons. Dos còps rampelèron, d’en primièr per Ben Yedder sus un bon centre del Tabanou, puèi a la tota fin del temps addicional, Ahamada, definitivament l’òme de la partida, quitèt sa gàbia, trauquèt lo camp per anar egalizar del cap (vidèo). Tolosa se salva aital a la darrièra segonda e demòra dins la primièra partida del classament.
 
 
Niça manca lo parat
 
Contra Lorient, l’esquipa suspresa de la començança de sason, los niçards manquèron l’hold-up. Dominats la màger part del jòc, e salvats maites còps pel portièr Joris Delle, decisiu arser, dobriguèron la marca avant la pausa d’una bèla volada del Camel Meriem. Lo Gim se pensava protegit pel sòrt (Bourillon se faguèt sortir per un còp de coide, un còp franc d’Autret sul pal), mas lo coratge de Lorient e la siá paciéncia finiguèron per pagar. Kevin Monnet Paquet, tot just intrat, trauquèt la defensa provençala, en la darrièra minuta del temps reglamentari, per anar enganar Delle.
 
Niça se’n torna amb un ponch, ça que la, amb un gost benlèu un pauc amar de s’èsser mancat quicòm.
 
 
Montpelhièr, encara ensorrat
 
Pels campions de França, l’ocasion semblava polida. L’acuèlh de Sant Estève, una setmana aprèp una desfacha a l’ostal contra Sochaux, seriá pogut èstre lo parat d’aviar enfin la temporada. Mas, que non, los òmes de René Girard an pas encara trapat la recèpta, ongan. Dominats pels verds, lor calguèt córrer darrièr l’escòre, Aubameyang en avent dobèrt lo marcador en lo temps addicional de la primièra temporada. Calguèt esperar l’ora de jòc per veire los eraureses entamenar la partida. Aprèp d’ensages d’Hilton e d’Estrada, Camara rampelèt enfin a la 70a minuta. Mas malgrat los esfòrces e un semblant de presa de responsabilitat, los montpelhierencs poguèron pas agafar mièlhs qu’un rampèl. Un ponch qu’es de bon préner, mas que respond pas a las interrogacions que tremolan La Palhada.
 
Los resultats:
Montpelhièr – Sant Estève 1-1; Bastia – París 0-4; Lorient – Niça 1-1; Brèst – Valencianas 2-1; Tolosa – Rennes 2-2; Rems – Nancí 2-0; Sochaux – Tròias 3-1; Bordèu – Ajaccio 2-2; Marselha – Evian-Thonon-Gaillard 1-0; Lilla – Lion 1-1.
 
 
L2. Mónegue torna lusir
 
Es pas un secret per degun: ongan, Mónegue a d’ambicions, e los mejans per las realizar. Dempuèi divendres de ser, se n’èra de besonh, la pròva es facha que l’esquipa blanca e roja s’afirma com granda favorida de l’L2. Mercés a Ibrahima Touré, autor de tres gòls, l’AE Mónegue capita una operacion de las bonas a Lens. S’impausan 4-0, sens tremolar brica, e se plaçan coma capdavant del classament, en esperar la partida de Dijon diluns de ser.
Istre eissorda lo vesin
 
Dins lo primièr dels maites dèrbis provençals que l’L2 prepausa ongan, los violets s’i virèron mièlhs que los crocodils. Mas la partida foguèt pas gaire estrambordanta: pauc d’agitacion ni d’ocasions abans aquela 76a minuta, que Niangbo trauquèt, dempuèi l’ala drecha, tota la defensa per trobar finalament l’angle mòrt del portièr nimesenc. A comptar d’aquí, la dominacion se faguèt mai preissanta, e se concretizèt amb un gòl de Fettouhi dins lo temps addicional. Istre demòra aital dins lo naut del classament.
 
 
Arle-Avinhon sens conviccion
 
Ludovic Butelle pòt mercejar David Suarez. Que son companh rodanenc, en rampelar contra Châteauroux aquel divendres, lo salvèt de marrits pantaises e de regrèts fòrts. A la 31a minuta, sus una passa enrèire mal assegurada, Butelle se manquèt e encaissèt un gòl pauc gloriós. Menats a casa, los del Comtat Venaicin saupèron reagir pasmens. Suarez, sièis minutas puèi, trobèt la gàbia d’un polit còp de cap descrosat. Lo marcador cambièt pas mai; l’ACA encadena un segond rampèl aderren.
 
Los resultats:
Lens – Mónegue 0-4; Le Havre – Nantes 1-1; Istre – Nimes 2-0; Ajaccio – Angieus 0-1; Arle-Avinhon – Châteauroux 1-1; Laval – Can 1-2; Lo Mans – Niòrt 2-2; Tors – Sedan 1-1.